Página Principal

Listado de ayudas

NOTICIAS ECONÓMICAS#COVID-19

O alcalde de Vigo abordará coa ministra de Turismo as axudas ao sector hoteleiro

Fuente: Concello de Vigo
10/02/2021

Tralo encontro mantido este mércores con Jaime Pereira, presidente da Asociación de Hoteis de Vigo, que lle trasladou a "difícil situación" pola que atravesa o sector cun nivel "moi baixo de ocupación", o rexedor reclama á Xunta de Galicia que lles dea as axudas que lles corresponden e que non lles están chegando.
Abel Caballero informou de que se reunirá con Reyes Maroto, ministra de Industria, Comercio e Turismo, a quen lle propoñerá a necesidade de artellar axudas ao sector hoteleiro xa que, no caso de Galicia, o goberno da Xunta "non está repartindo as achegas e está facendo caixa coas axudas que lle dan".

O alcalde apuntou que grandes hoteis da cidade están recibindo "2.000 ou 3.000 euros que non lles chegan nin para a apertura dun día" polo que a axuda "máis importante recíbena dos ERTE do goberno de España" e criticou que a Xunta "non estea tomando en serio as consecuencias económicas" da pandemia, detallando que recibiu máis de 400 millóns de euros dos fondos REACT-EU dos que non destina "nada para pequeno comercio, autónomos ou hostalería".

Amais, sinalou Caballero que lles transmitirá ás ministras de Traballo e Turismo a necesidade de "manter os ERTE o tempo preciso. Non pode haber data límite porque a recuperación do turismo e dos hoteis vai moito máis lenta do que se prevía en España e en Europa".

Na reunión deste mércores con Jaime Pereira, presidente de Ahosvi, o rexedor explicoulle que os asesores Covid do Concello están mantendo contacto cun número importante de hoteis da cidade cos que confirman que "os descensos de facturación o ano pasado foron moi altos, de case o 70%, polo que precisan axudas" e "vai haber que repropoñer as achegas de Europa" incidindo na urxencia de que "se reordeen" dada a "falta de transparencia" no caso da Xunta de Galicia que "está facendo caixa".